Klatsch und Tratsch aus dem Lehrer*innenzimmer. Die Berndeutsch-Kolumne der Vereinigung der Studierenden an der PH Bern. #24

Aus PH-Student oder -Studentin wird me nid säute belächlet. Ei Vorteil hei mir gägänüber de Uni-Studierende aber: Mir chöi ad Schuele go Steuverträtige gä. So sammle mer wärtvoui Erfahrige u chöi ou no grad üses Kässeli guet ufbessere. Zudem hei die Steuverträtige der Vorteil, dass me ab und zue us em Distance-Learning-Sumpf usechunnt. Eigentlech nid schlächt.

Letscht Wuche ha ig de ume wider e Steuverträtig dörfe gä. Anere füfte Klass im Dorf woni wohne. Die Klass hani scho es paar Mau unterrichtet und si het im Lehrer*innezimmer nid unbedingt der agnähmst Ruef.

Es isch de o ä ahsträngende Namitag worde und ig bi froh gsi, woni d Kind ändlech ha i Fürabe chönne schicke. Für mi Chopf z lüfte, bi ig nach dene stränge Lektione e Rundi i Waud go jogge. Keini füf Minute nachdäm ig wider daheime bi gsi, hets ar Türe glütet. Ig bi ganz verschwitzt gsi, ha es rots Gsicht gha wiene Tomate, ha gstunke und bi schlichtwäg kaputt gsi. Churz: Ä dänkbar schlächte Zytpunkt fürnes Gspräch ar Hustüre. Aber das isch sicher nur mi Nachbar mit emne Zalandopäckli, hani denn no dänkt und ha die Hustüre ufta.

Und da bini so verchlüpft, das ig fasch hindertsi wär umgheit. Vor mir steit e Schüeler us dere besagte füfte Klass. Er luegt mis Ketchup-rote Gsicht ganz verwunderet ah und fragt: «ääh, syt dir d Frou Schwarz?» Lügne het da kei Zwäck me gha. Der Schüeler isch uf sire Rundi gsi, zum Sponsore sammle füre Schuttklub. Ig ha diräkt wider afah schwitze, was aber kei Roue me het gspiut, wüu ig ja scho nass wiene Putzlappe bi gsi. Ig ha versuecht mini wunderschöni Ufmachig z ignoriere und ha mis beste gä im Smalltalk mitem Schüeler.

Sogar zwöi Franke hani iz gspändet füre Schuttklub. Em Schüeler isch is Gsicht gschribe gsi, wie pinlech dasers findet, vor der Hustüre vo sire stinkende Lehrerin z stah. Das het am nächste Tag sicher e super Pousegschicht gä für sini Fründe.

Und was chöi mir iz us dere chline Gschicht lerne? Gib nie, aber ou würklech absolut nie, im gliche Dorf schueu, wie du wohnsch. 
U wenn doch, gang nid go jogge.