Mis Bern

Und i glaube i liebe di

I glaube i liebe, dass i di noni so guet kenn

Trotzdem schmöcksch irgendwie scho vertraut

Nach öppisem woni vermiss

Dusse isches dunkel und i gsehne nüt

Bini allai oder hets eifoch kei lüüt

D Name vo de Tramstatione töned unheimlich

So unheimlich fremd

Und i denk warum bini nöd öpper, wo das alles scho lang kennt

Min Schlüüsel kratzt im Schloss und es hallt

i de wohnig verflüsst de Ton i de Wand

Und i gnüsse d Liechtli am Fenster wo hanged

D Pflanze am Sims wo di letze sunnstrahle fanged

Mir schiints, im chopf redets nüm so vill

Es isch fasch scho still

Bis mer chli und fii

Mis Herzli Gschichte verzellt

Und dodebii isch meh als eini

über di

Drum, I glaube i verliebe mi

I dini Kurve und din Gruch

D Sunne am Morge im Fenster

Und d Schatte a de Dächer am Abe

Dini Gschichte und dini Zuekunft mit mir

Wieni mi i dir cha verlüre aber du mi immer wieder

Wiederfindsch

Und i mi i dir Neuerfind

Du hebsch mi fest wenni wieder verflüüs

Denn verzellsch mer vo de Aare

Blau und grüe und lüüchtig und überhaupt

wie sie di umschlingt,

wie si gurgled und rüeft

gheit und rollt

dim Rand entlang, über stei und sand

So hebsch au du mich

Umarmsch mi mit dim Wese, dinere Luft

Mengisch schnell

Aber meistens langsam

Kreisisch um mich und ich

I dir

Bisch echt stolz, wöri di denn frage, uf dini Gschicht

Uf alles wa du gsi bisch

Alles was worde isch, vo dir cho isch und i dir gange isch

Uf alles wad no chasch werde uf

alles wad nie wirsch sii

S Alt im Neue und s Neue im Alte

So simmer mitenand

Anders und doch gliich

Divers und einzigartig

I glaube i verliebe mi i di, mis Bern

I kenne di no ned, aber i glaub du mi scho.

Vilicht bliibsch mer fremd und gheim

Trotzdem wirsch mer immer meh es dehei

I liebi di, Bern

I dir bini frei